#الحلقة5
المنظر من فوق المسرح يختلف تماما عن المنظر من أسفل
حيث تسارعت دقات قلب فرح تتساءل بداخلها:هو إيه اللى جابنى هنا؟!وشعرت أن قدميها قد شلت عن الحركة وقدميها إلى حد ما تحملانها بصعوبة
وقد انتاب الجميع حالة من التحديق والإنتباه الشديد ،الجميع ينظر إلى فرح بإعجاب شديد وبدأت الأقلام أخيرا تتحرك من أماكنها لتدون رقم فرح( 20)
عندما رأت منى فرح ،أصابتها الدهشة واتسعت عيناها،وأدارت وجهها بعيد عن فارس ،وأخذت تنظر له نظرات خاطفة
ولكنها عندما نظرت إلى فارس أصابتها الدهشة الأكبر فلم يكن فارس ينظر إليها
فقد كان ينظر إلي فرح باهتمام شديد ،كان يبدو عليه أنه فى عالم آخر
فأخذت منى تنظر إلى فرح التى بدت جميلة جدا على المسرح وإلى فارس الذى بدا مسحورا
منى بصوت حنون تضع قبضة يدها على خدها:حلوة أوى
فارس بدون انتباه وبنفس عميق وابتسامة :أوى
فتحدق منى أكثر إلى فارس
ثم انتبه فارس إلى منى :هى دى اللى فى الشقة يا منى ؟
منى ترد سريعا:والله يا فارس ،ماكانش قصدى أكدب عليك ،هى اللى أصرت إنى معرفكش إنها هنا
******
شمس بغضب لكريم:،مين دى إن شاء الله ،تعرفها؟
كريم لم يكن منتبها لشمس:هاه
شمس بغضب أكبر:بقولك تعرفها؟
تركها كريم غير مبال لكلامها وذهب باتجاه المسرح
شمس:كريم ٠٠٠٠
ثم تنطفى الشاشة ويقل الضوء عن المسرح
تجرى منى باتجاه فرح حيث صعدت على المسرح لتأخذ فرح حيث سارت معها ببطء :
يلا يا أميرة ،إنت متمسرة مكانك كده ليه؟هو انتى طلعتى ازاى هنا؟منين بتقولى مش عايزة فارس يعرف إنك هنا ومنين تطلعى على المسرح فالكل يشوفك بما فيهم فارس
********
تذهب شمس إلى والدتها التى كانت تجلس مع بعض السيدات قائلة بغضب:ماما يا ماما
علا(والدة شمس):اسمحولى
علا تذهب إلى شمس:في إيه يا شمس؟مالك؟
شمس بغضب:شوفتيها ،شوفتيها عاملة إزاى؟مين البت دى ياماما ؟تعرفيها؟ها ياماما تعرفيها؟
علا تحاول أن تهدأ شمس:أعرفها منين بس ياشمس؟
شمس:آمال مين اللى جابها على الحفلة ؟
علا:يا حبيبتى ممكن تهدى ؟مين دى أصلا علشان تكسب المسابقة؟إنتى اللى هتكسبيها وهتشوفى
*********
تقترب منى وفرح بخطوات بطيئة جدا باتجاه فارس الذى وقف ينظر إليهما نظرات صامتة يملؤها الغضب
وتقتربا وتقتربا و_______
(أميرة،كنتى جامدة آخر حاجة ،وحاسس إنك هتكسبى المسابقة دى وهتشوفى وهتقولى كريم قال )
لقد تدخل كريم فجأة فقطع الطريق بين فرح وفارس
لم يتمكن فارس أن يخفى غضبه أكثر من ذلك فاتخذ خطوات سريعة غاضبة ولم تكن باتجاه فرح بل بعيدا عنها
وعندما رأت فرح أن فارس ابتعد عن المكان أخذت نفسا عميقا ،بعدما كادت لا تتمكن من التنفس
منى بتعجب:كريم!انت تعرف أميرة منين؟
كريم :لسه متعرف عليها من شويه ،بعدين مش تقولى إزيك الأول عامل إيه؟كده يعنى ،المهم سيبك،إنتى عاملة إيه ؟وإيه أخبارك؟
منى:الحمد لله ،أمورى أهى ماشية
كريم وكأنه تذكر شيئا :بس صحيح يا منى ألا قوليلى مش هو ده الفستان اللى دخلتى بيه مسابقة فى شركة صن موضة بتاعة علا هانم لأفضل مصمم فى الشركة
منى بابتسامة :أيوا بالظبط ،ذاكرتك قوية على فكرة
كريم:وهو ده فستان يتنسى
(لم تكن تفهم فرح شيئا من حديث منى وكريم،وفى الأغلب كانت شاردة)
*********
وعلى منضدة كانت تجلس مى مع نورهان(موظفة فى الشركة)
نورهان بكلام ممزوج بالضحك :تعرفى يامى لو شمس مافازتش فى مسابقة السنة دى بالذات ممكن يجيلها شلل ،أو تكبر 20 سنة أدام،أصل السنة دى مش زى أى سنة ،أصل بعد ما مات باباها وفارس بقى بيساعد مامتها فى شغل الشركة ،يعتبر معظم الشغل فارس اللى بيعمله ،والجايزة السنة دى هو اللى هيقدمها،وكمان إيه دى عبارة عن سلسلة دهب متعلق فيها قلب ألماظ منقوش فيه اسم فارس،يعنى جايزة سو رومنتك ،شمس يجرالها حاجة لو مخددتهاش
مى باستغراب:اسم فارس؟!
نورهان:أيوا يا بنتى زى ما بقولك كده ،شمس طلبت من مامتها تعمل كده ،بس تقريبا ميعرفش إن هما عملوا كده ،الجايزة كل سنة كانت زى تاج
يدخل كريم فجأة:إيه يا مى ،تليفونك يا بنتى كان مع أميرة ،امسكى
نورهان :إيه يا كريم الشياكة دى
كريم :ربنا يخليكى يا نورا يارب ،من ذوقك والله
نورهان:انت قصيت شعرك شويه ولا أنا بيتهيألى
مى بغيظ ونفاذ صبر:اه انتى واخدة بالك ،تصدقى مكنتش واخدة بالى خالص
نورهان:لأ إزاى ؟أصل شكله بقى أحلى
كريم بابتسامة خفيفة:إحم طب استأذن أنا
نورهان بعد أن رحل كريم:بس إحلو أوى يا مى وبقى شيك خالص
مى لا تعيرها انتباها :يا٠٠٠٠(وتنهض سريعا كأنها ذاهبة إلى شخص ما)
**********
منى :بقولك إيه يا أميرة ،انتى تقعدى هنا لحد ما شوف فارس راح فين
(ويضى المسرح فجأة وتتوقف الموسيقى ،ورجعنا تانى يا جماعة علشان نعلن عن الفائزة للليلة دى )
فرح شاردة
شمس يكاد أن يتوقف قلبها
فارس يقف بعيدا غير مهتم
منى مى كريم متحمسون
والجميع يتابع باهتمام
(اللى فازت معانا المودموزيل رقم 20)
*********ولكم أن تتخيلوا :
ماما، قلبى (لقد أغمى على شمس)
فرح فوجئت بأضواء المسرح تسلط عليها والناس تصفق لها
فارس يقف مندهشا
مى وكريم يصفقان
منى تصفق و تبتسم وتبكى فى نفس الوقت وجاءت مى واحتضنت منى
مى لمنى:ربنا مابيضيعش تعب حد
(ياريت الآنسة تتفضل على المسرح)
منى ذهبت لفرح:يلا يا أميرة
فرح بخوف:رجلى مش شيلانى
منى :يلا ماتخفيش أنا معاكى
(صعدت فرح للمسرح )
((دلوقتى يتفضل مندوب باسم شركة صن موضة لتقديم الجايزة))
منى لفارس:براحتك يا فارس أنا هطلع لأميرة
يمسك فارس منى من ذراعها وهو ينظر لفرح،ويتقدم باتجاه فرح ،
فرح لا تنظر إلى فارس بل تحاول أن تشغل ناظريها بأى شئ آخر
ولكن قلبها وعقلها مشغولان بما يحدث (فارس!فارس هو المندوب )لم تكن تعلم فرح هل يجب أن تفرح أم تبكى فلم تكن تصدق مايحدث
وتقدم مقدم الحفل بالجائزة لفارس (سلسلة !محدش قالى إنها سلسلة )تعجب فارس من رؤية السلسلة
مد فارس يديه لأخذ السلسلة التى نقش عليها اسمه
*********
(شمس ،قومى يا حبيبتى يلا)
تفيق شمس بعد أن أغمى عليها ،تحاول علا أن تسندها حتى تقوم
(ماما ،مش الفستان ده هو الفستان اللى عملته منى)
ثم تقف شمس فيقع ناظريها على فارس الذى يعطى العلبة بها السلسلة إلى فرح
(آه،لأااااااا)ويغمى عليها مرة آخرى
علا بخوف:شمس!
**************
خارج الفيلا ،
منى:بس إنت ملبستهاش السلسلة ليه ؟!
فارس:سلسلة إيه اللى ألبسهلها ،تحمد ربنا أصلا إنى طلعتلها
منى :يا سلام ما أنا كنت هطلعلها ﻹن إنت رافض تطلع تسلم جايزة لحد ،لكن واضح إن فرح مش أى٠٠٠
فارس بغضب:منى ،إنتى هتلغبطى فى الكلام ولا إيه ؟أنا عملت كده علشان أغيظ شمس..وأخليها تبعد عنى
منى :يا سلام ،طب أنا رايحة بقى أصلى سايبة أميرة قاعدة لوحدها فى العربية
ذهبت منى وركبت سيارتها ،وكانت فرح شاردة تمسك بالعلبة الزجاجية التى ترى بداخلها السلسلة
منى تدير السيارة:ايه السلسلة عجبتك
فرح:ها ،اه جميلة ،بس أنا مش فاهمة إيه حكاية الفستان اللى كريم بيتكلم عليه ده ؟
منى بابتسامة:أصل الفستان اللى إنتى لابساه ده ،كنت متقدمة بيه فى مسابقة فى شركة مامت شمس ،وكنت هفوز بس حصل لعب فى النتيجة وكل الموظفين عارفين كده بس محدش قدر يتكلم ،كل ده علشان بنت صاحبة طنط علا تكسب المسابقة ،مجاملة يعنى
ولما عرفت كده ،قدمت استقالتى ،واشتغلت فى شركة تانية ،ولما الفستان ده النهاردة قهر شمس ومامتها ،حسيت إنى استرديت كرامتى ٠بس تعرفى الفستان عليكى يجنن بجد
ابتسمت فرح ابتسامة رقيقة
**********
فارس يتمدد على سريره ،يفكر فى تلك الليلة وما حدث بها ،ينظر إلى السقف ويحدث نفسه :هو أنا ليه طلعت للبت دى ؟ما أنا كنت قلت لمنى إنى مش هطلع وهخليها هى تطلع بدالى ،ليه لما شوفتها غيرت رأيى وطلعت؟
ياترى فعلا علشان أغيظ شمس ،ولا أنا بضحك على نفسى
كان يحاول فارس أن يقنع نفسه بأنه فعل ذلك فعلا كيدا لشمس
لكن مازال هناك شيئا بداخله يجعله لا يقتنع بذلك
*********
فى صباح اليوم التالى الساعة الثامنة والنصف صباحا ،فارس فى سيارته يتصل بمنى
منى :أيوا يافارس
فارس:الورق اللى كنت قلتلك خليه معاكى عايزة
منى :اه ده فى الشقة يافارس
فارس:طيب خلاص هعدى أخده
منى :ومالو أنا سيباه فى الدولاب ،عدى على أميرة وقولها وهى هتديهولك
فارس بتعجب:أميرة!وانتى فين؟
منى :أنا فى المكتب من بدرى يافارس ،عندى شغل كتير النهاردة
************
يصعد فارس على سلم العمارة التى تسكن فيها منى (اه لو مكنتش محتاجه دلوقتى ضرورى )
يدق فارس على باب الشقة
تفتح فرح :يووووه قلت لما تيجى..
تصمت فرح فجأة وتبحلق من صدمتها وتفتح فمها على مصراعيه
يبحلق فارس بشدة ولا ينطق بحرف ،وتمنت فرح لو تتمكن من أن تغلق الباب ،أو أنها لم تفتحه من من الأساس
#يتبع